تفسیر سورۃ البقرہ - آیت نمبر 16- ہدایت کے بدلے گمراہی خریدنا۔۔۔ بدعات و خرافات اور ہمارا کردار؟

 اَلحمدُ للہِ وَحدَہُ ، وَالصَّلاۃُ والسَّلامُ علَی مَن لاَّ نَبِیَّ بَعدَہُ ، أمَّا بعدُ : فاَعُوْذُ بِاللّٰہِ مِنَ الشَّیْطٰنِ الرَّجِیْمِ، بِسمِ اللّٰہِ الرَّحْمٰنِ الرَّحِیْمِ۔

رَبِّ اشْرَحْ لِیْ صَدْرِیْٗ وَ یَسِّرْ لِیْۤ اَمْرِیْٗ وَ احْلُلْ عُقْدَةً مِّنْ لِّسَانِیْٗیَفْقَهُوْا قَوْلِیْ۪

ارشادِ باری تعالیٰ ہے: أُولَئِكَ الَّذِينَ اشْتَرَوُا الضَّلَالَةَ بِالْهُدَى فَمَا رَبِحَتْ تِجَارَتُهُمْ وَمَا كَانُوا مُهْتَدِينَ)16(

انہوں نے ہدایت کے بدلے گمراہی خریدی  تو نہ تو انکی تجارت نے انہیں نفع دیا اور نہ ہی وہ ہدایت پا سکے۔

اس آیتِ کریمہ میں جو سب سے پہلی غور طلب بات ہے وہ یہ  ہے کہ یہاں پہ منافقین کے اس عمل کو ان کے نفاق کو تجارت و خرید و فروخت  سے تشبیہ دیا گیا ہے۔ یہ نہیں کہا گیا کہ انہوں نے ہدایت کے بدلے گمراہی اختیار کی بلکہ فرمایا گیا أُولَئِكَ الَّذِينَ اشْتَرَوُا الضَّلَالَةَ بِالْهُدَى کہ انہوں نے ہدایت کے بدلے گمراہی خریدی ۔ اس کی وجہ یہ ہے کہ تجارت  یا خریدو فروخت کا معاملہ جب آپ  کر رہے ہوتے ہیں تو ایک چیز دے رہے ہوتے ہیں اور ایک لے رہے ہوتے ہیں یعنی مال کے بدلے مال یا مال کے بدلے نقد رقم، تو جب آپ خرید و فروخت کرتے ہیں ، تجارت کرتے ہیں تو دونوں چیزیں آپ کے پاس نہیں رہتیں  ، یہ نہیں ہوتا کہ آپ مال بھی لے لیں اور اس کے بدلے کچھ دینا بھی نہ پڑا۔

منافقین جنہیں آپ ﷺ کی صحبت بھی نصیب ہوئی صحابہ کرام رضوان اللہ علیہم اجمعین کا ساتھ بھی نصیب ہوا لیکن اس کے با وجود انہوں نے ہدایت کو چھوڑ کے ، دین حق کو چھوڑ کر، اطاعت ِ محمد الرسول اللہ ﷺ کو پسِ پشت ڈال کر نفاق کا رستہ اختیار کیا  تو ان کے پاس اب دونوں چیزیں تو نہیں رہ سکتیں ہدایت کو جب چھوڑ کر، ظاہراً خود کو مسلمان کہلوا کر  عملاً  اسلام دشمنی کرتے رہےتو ان کے اس عمل نے ان کے نفاق نے ، انکی اس تجارت نے انہیں کچھ فائدہ نہیں دیا  بلکہ وہ دگنے نقصان کا شکار ہوئے کہ ایک تو اس گمراہی کیوجہ سے ، اس کھاٹے کی تجارت کی وجہ سے دنیاوی ذلت و رسوائی  ان کا مقدر ہوئی اور دوسرا نقصان اخروی ہوا کہ ہدایت یافتہ نہ ہونے کیوجہ  سے وہ نارِ جہنم کے مستحق ہوں گے۔

منافقین کیسے لوگ ہیں ؟ اور نفاق کیا ہے؟

قاسمِ فیوضات حضرت مولانا محمد اکرم اعوان رحمتہ اللہ علیہ اکرم التفاسیر میں فرماتے ہیں : اللہ پناہ دے کہتے رہنا کہ میں مسلمان ہوں ، کلمہ پڑھتے رہنا ، نمازیں پڑھتے رہنا ، روزے رکھتے رہنا ،حج کرتے رہنا ،زکوٰۃ دیتے رہنا  لیکن کردار کی اصلاح نہ کرنا  اور دنیوی لالچ میں آکر کردار میں  برائیاں پیدا کر لینا ، چند ٹکوں کے عوض جھوت بول لینا ، چند سکے کمانے کے لئے دھوکہ دینا ۔ نتائج تو عملی زندگی پہ مرتب ہوں گے، زبانی قول پہ نہیں، کوئی کہتا ہے کہ میں نے زہر کھا لیا  تو صرف کہنے سے نہیں مرتا  لیکن اگر کوئی یہ اعلان نہ بھی کرے اور عملاً زہر کھا لے  تو مر جائے گا ۔ نتائج عمل پہ مرتب ہوتے ہیں ۔ ،منافقین ایسے بدبخت ہیں کہ انہوں  نے ہدایت کو چھوڑ کر گمراہی کو اپنایا۔

اللہ معاف فرمائے ہمارا معاملہ  بھی کچھ اس طرح کا ہے کہ ہمیں دین ِ اسلام کیلئے، نورِ ہدایت کیلئے کچھ بھی محنت و مشقت نہیں اٹھانا پڑی بلکہ الحمد اللہ ہم پیدا ہی مسلمان گھرانوں میں ہوئے، ابتدائی دینی تربیت ماں کی گود سے ہی شروع ہو گئی، پیدا ہوتے ہی ہمارے کانوں میں اذان دے دی گئی، تھوڑے سے بڑے ہوئے تو والدین اور اساتذہ نے بنیادی ارکانِ دین سکھا دیئے، اسلامی معاشرے میں پروان چڑھے، گھر کا ماحول ہو ، سکول کے استاتذہ ہوں یا علماء و مبلغین کے خطبات ہر جگہ دین پڑھایا اور سکھایا جاتا رہا ۔ اب اس سب کے باوجود اگر ہم صراطِ مستقیم کو چھوڑ کر ، راہِ ہدایت کو چھوڑ کر اسلامی تشخص و کردار اپنانے کے بجائے گمراہی کی طرف جاتے ہیں، کافرانہ طرزِ عمل اپناتے ہیں ، ایسی جدت پسندی جو اسلام سے متصادم ہے اسے روشن خیالی کا نام دے کر اسلامی تعلیمات سے روگردانی کرتے ہیں ۔ بے حیائی کو روشن خیالی، سود کو کاروبار، یہود و نصاریٰ جیسی شکل و صورت کو فیشن ، حلال و حرام کی تمیز چھوڑنا وقت کی ضرورت اور جہاد فی سبیل اللہ اور اسلام کے دشمنوں کے خلاف قتال کو دہشتگردی سمجھتے ہیں ، دین میں اپنی پسند و ناپسند سے  طرح طرح کی بدعات و خرافات شامل کرکے انہیں عبادات سمجھتے ہیں، زکوٰۃ و صدقات کے اسلامی طریقے کو چھوڑ کر ذاتی نمائش کیلئے دین کے کاموں میں خرچ کرکے اسے عبادت کا درجہ دیتے ہیں تو ہمارا معاملہ بھی کچھ زیادہ مختلف نہیں ان لوگوں سے۔

مولانا اشرف علی تھانوی رحمتہ اللہ علیہ اپنے ارشادات میں فرماتے ہیں  کہ دین میں جو نئی نئی رسومات ایجاد کی جاتی ہیں، یہ ایسی بدبختی ہیں جنہیں شریعت میں بدعت کہا گیا ہے۔ بدعت کیا ہے؟ دین  کے نام پہ کوئی نئی رسم ایجاد کریں اور اسے شریعت قرار دیں جسے اللہ نے عبادت قرار نہیں دیا ، جسے نبی کریمﷺ نے عبادت قرار نہیں دیا، جو کام خلفائے راشدیں کے دور سے ثابت نہیں ہوتا۔

مولانا تھانوی رحمتہ اللہ علیہ فرماتے ہیں کہ بدعت کی مصیبت یہ ہے کہ بندے کو توبہ نصیب نہیں ہوتی۔ وجہ کیا ہے؟کیوں کہ جو گناہ کو گناہ سمجھ  کر کرے اسے پتہ ہے کہ یہ کام غلط ہے ،شریعت ِ اسلامیہ کے مطابق گناہ کا کام ہے  تو ممکن ہے اسے کسی وقت احساسِ ندامت ہو جائے اور وہ توبہ کرلے۔ لیکن جو گناہ کو گناہ سمجھ ہی نہیں رہا بلکہ اس کے نزدیک وہ نیکی کا کام کر رہا ہوتا ہے  اب جسے وہ نیکی سمجھ رہا ہوتا ہے  تو نیکی سے توبہ کب کرے گا؟ جبکہ یہ اس کا ذاتی خیال ہوتا ہے اگر وہ اسے شریعتِ اسلامیہ پہ  پرکھے تو وہ نیکی کا کام ہے ہی نہیں۔

یہی بات اس آیتِ کریمہ  میں بیان فرمائی کہ ہدایت کے بدلے ، ہدایت کے میسر ہونے کے باوجود  انہوں نے گمراہی  اختیار کی  تو ان کا معاملہ یہ ہوا ، اس کا نتیجہ یہ نکلا کہ فَمَا رَبِحَتْ تِجَارَتُهُمْ وَمَا كَانُوا مُهْتَدِينَ یعنی انکی یہ تجارت ، انکے اس معاملے نے ان کو کوئی فائدہ نہ دیا اور دوسرا  نقصان کہ یہ کبھی ہدایت نہیں پائیں گے چونکہ یہ جو کچھ کر رہے ہیں  اسے یہ اچھا سمجھتے ہیں ، اسی یہ اپنی قابل و لیاقت اور اپنے فہم کے مطابق صحیح تصور کرتے ہیں  تو اب اچھے سے ، صحیح سے توبہ کون کرے گا ، مفروضہ نیکی سے توبہ کون کرے گا۔ یعنی یہ نہ صرف دنیا بلکہ آخرت میں بھی نقصان اٹھائیں گے۔

 اللہ تعالیٰ ہمیں بدعات و خرافات میں پڑنے سے بچائے اور خود ساختہ نمائشی کاموں سے بچائے۔

اللہ تبارک وتعالیٰ ہمیں صراطِ مستقیم سمجھنے اس پہ عمل کرنے اور تا دم آخر اس پہ قائم رہنے کی توفیق و ہمت عطا  فرمائے۔

آمین یا رب العالمین

دعاؤں کا طالب

ابو محمد زبیر اویسی

مکمل تحریر >>>

تفسیر سورۃ البقرہ - آیت نمبر 14,15 - ہمارا حال مومنین جیسا یا منافقین جیسا - اللہ کے مذاق کرنے سے کیا مراد ہے؟

 

اَلحمدُ للہِ وَحدَہُ ، وَالصَّلاۃُ والسَّلامُ علَی مَن لاَّ نَبِیَّ بَعدَہُ ، أمَّا بعدُ : فاَعُوْذُ بِاللّٰہِ مِنَ الشَّیْطٰنِ الرَّجِیْمِ، بِسمِ اللّٰہِ الرَّحْمٰنِ الرَّحِیْمِ۔

رَبِّ اشْرَحْ لِیْ صَدْرِیْٗ وَ یَسِّرْ لِیْۤ اَمْرِیْٗ وَ احْلُلْ عُقْدَةً مِّنْ لِّسَانِیْٗیَفْقَهُوْا قَوْلِیْ۪

ارشادِ باری تعالیٰ ہے: وَإِذَا لَقُوا الَّذِينَ اٰمَنُوْا قَالُوْۤا اٰمَنَّا  وَإِذَا خَلَوْا إِلٰى شَيٰطِيْنِهِمْ  قَالُوْۤا إِنَّا مَعَكُمْ  إِنَّمَا نَحْنُ مُسْتَهْزِئُونَ

اور جب ایمان والوں سے ملتے ہیں تو کہتے ہیں کہ ہم ایمان لے آئے اور جب اپنے شریر سرداروں سے علیحدگی میں ملتے ہیں تو کہتے ہیں ہم تمھارے ساتھ ہیں۔ہم تو مذاق کیا کرتے تھے۔

اس آیتِ کریمہ میں منافقین کی ایک اور علامت بیان کی گئی کہ جب مومنین سے ملتے تھے تو کہتے تھے کہ ہم دینِ حق کو قبول کرتے ہیں ، شریعتِ مطہرہ کی حقانیت کو تسلیم کرتے ہیں، اسلام کی صداقت کو مانتے ہیں اور پھر جب اپنے ہم خیال، شریر اور گمراہ سرداروں کے پاس جاتے تھے تو کہتے تھے کہ ہم تو تمہارے ساتھ ہیں ہم تو جھوٹا دعویٰ ایمانی کرکے ان سے مذاق کرتے ہیں حقیقت میں تو ہم ایمان نہیں لائے۔

اس آیتِ کریمہ میں جو قابل غور پہلو بیان ہوا کہ ایمان والوں ، نیک لوگوں کے ساتھ  خود کو نیک اور پکا و سچا مومن  ظاہر کرنا جبکہ کافروں ، گنہگاروں ،فاسقوں کے ساتھ ویسا ہو جانا جیسا وہ لوگ ہیں تو یہ منافقین کی صفت ہے۔

دورِ حاضر پہ غور کرنے سے پتہ چلتا ہے کہ یہ علامت ہمارے ہاں کثرت سے پائی جاتی ہے ۔ہم جب علماءِ کرام کا وعظ و بیان سن رہے ہوتے ہیں،مبلغینِ اسلام کی صحبت میں بیٹھے ہوتے ہیں ، اولیاءِ کرام  و اہل اللہ  کے پاس ہوتے ہیں  تو ان کا وعظ و بیان ، انکی نصیحتیں ، انکی تبلیغ کو نہ  صرف بڑے غور سے سن رہے ہوتے ہیں بلکہ یہ ظاہر کر رہے ہوتے ہیں کہ ہم آپ کی باتوں کو دل و جان سے قبول کرتے ہیں۔ دینِ اسلام کی حقانیت اور شریعتِ مطہرہ کی تعلیمات پہ ہمیں ذرا برابر بھی کوئی شک وشبہ نہیں ۔ لیکن  پھر جب عام معاشرے میں بے عمل اور بد کردار لوگوں کی صحبت میں آتے ہیں تو ویسے کے ویسے ہو جاتے ہیں جیسے وہ لوگ ہیں ، ہمارا عمل تعلیماتِ اسلامیہ کے بر عکس ہوتا ہے ۔ زبان سے تو اقرار کرتے ہیں لیکن عمل اس کے خلاف کرتے ہیں۔بلکہ یہاں تک میں نے خود لوگوں سے سنا ہے کہ جب دوست احباب نے کسی اچھی اور نیک محفل کے بارے میں دریافت کیا تو کہتے ہیں کہ بس اتفاق سے پھنس گیا تھا ، ان لوگوں کا دل رکھنے کیلئے تھوڑی دیر ان کی باتیں سننی پڑیں۔ ورنہ آپ کو تو پتہ ہی ہے میرا کہ جتنا میں مومن ہوں یا نیک ہوں۔ اللہ ہمیں اپنی پناہ میں رکھے یہی بات منافقین کیا کرتے تھے کہ ہم تو مذاق کرتے ہیں  حقیقت میں تو ہم  تمہارے ساتھ ہیں ،ہم تم جیسے ہی ہیں ،ہم تو بس دل بہلانے کیلئے، دل رکھنے کیلئے  مومنین کی باتیں سن لیتے ہیں۔

اگلی آیتِ کریمہ میں ارشاد ہوتا ہے:

 اَللّٰهُ يَسْتَهْزِئُ بِهِمْ وَيَمُدُّهُمْ فِيْ طُغْيَانِهِمْ يَعْمَهُونَ

اللہ ان سے مذاق کرتے ہیں اور انہیں مہلت دیئے جاتے ہیں کہ وہ اپنی سرکشی میں سرگرداں ہو رہے ہیں۔

قاسمِ فیوضات حضرت مولانا محمد اکرم اعوان رحمتہ اللہ علیہ اکرم التفاسیر میں فرماتے ہیں کہ مذاق کرنا شانِ باری تعالیٰ سے بعید ہے۔ جب اس طرح کا کوئی لفظ اللہ تعالیٰ کی ذات کی طرف منسوب کیا جاتا ہے  یا اس طرح کی کوئی صفت اللہ کریم کی طرف منسوب  کی جاتی ہے  تو اس سے معنیٰ بعید مراد ہوتا ہے۔

معنیٰ بعید وہ ہوتا ہے جو نتیجہ  ہوتا ہے مثلاً آپ کسی سے مذاق کرتے ہیں کہ میں  آپ کو دس ہزار انعام دوں گا  اور آپ دیتے نہیں تو اس میں اس کی سبکی بھی ہے کہ وقتی طور پہ وہ خوش ہوا ، پچاس بندوں کو بتا دیا پھر اسے ملا کچھ بھی نہیں  نتیجہ میں محرومی حصے میں آئی تو  یہاں فرمای گیا  اَللّٰهُ يَسْتَهْزِئُ بِهِمْ اللہ ان سے مذاق کرتے ہیں  یعنی اللہ کریم ان سے ایسا سلوک کرتےہیں  کہ وہ محروم ہو جاتے ہیں ۔

وہ سمجھتے ہیں کہ ہم مذاق کر رہے ہیں  لیکن اصل میں مذاق ان کے ساتھ ہو رہا ہوتا ہے کہ وقتی طور پہ تو وہ اپنے اس اداکارانہ رویے سے خوش ہو رہے ہوتے  ہیں لیکن اس کا نتیجہ انہیں عذاب کی صورت میں ملے گا اور پھر صرف یہی نہیں بلکہ سزا کے طور پہ  فرمایا گیا کہ  وَيَمُدُّهُمْ فِيْ طُغْيَانِهِمْ يَعْمَهُونَ انہیں مہلت دیئے جاتے ہیں کہ وہ اپنی سرکشی میں سرگرداں ہو رہے ہیں۔   اللہ تبارک وتعالیٰ انہیں ڈھیل دیے جا رہا ہے انہیں موقع میسر کئے ہوئے ہے تاکہ وہ اپنے اس رویے میں ،اپنی اس سرکشی میں ہی ہمیشہ  پھنسے رہیں ، اس کو اپنا کمال سمجھتے رہیں  اور مزید بھٹکتے رہیں اور آگے سے آگے جاتے جائیں اور پھر آخرت میں اس عذاب کا سامنا کریں جو اللہ تعالیٰ نے ان کے لئے تیار کر رکھا ہے۔

اللہ تعالیٰ ہمیں ایسی سرکشی سے محفوظ فرمائے۔

اللہ تبارک وتعالیٰ ہمیں صراطِ مستقیم سمجھنے اس پہ عمل کرنے اور تا دم آخر اس پہ قائم رہنے کی توفیق و ہمت عطا  فرمائے۔

آمین یا رب العالمین

دعاؤں کا طالب

ابو محمد زبیر اویسی

مکمل تحریر >>>

تفسیر سورۃ البقرہ - آیت نمبر 13 - صحابہ کرام کو معیارِایمان قرار دیا گیا اور ان سے بغض و عناد کا نتیجہ بھی بتا دیا

 

اَلحمدُ للہِ وَحدَہُ ، وَالصَّلاۃُ والسَّلامُ علَی مَن لاَّ نَبِیَّ بَعدَہُ ، أمَّا بعدُ : فاَعُوْذُ بِاللّٰہِ مِنَ الشَّیْطٰنِ الرَّجِیْمِ، بِسمِ اللّٰہِ الرَّحْمٰنِ الرَّحِیْمِ۔

رَبِّ اشْرَحْ لِیْ صَدْرِیْٗ وَ یَسِّرْ لِیْۤ اَمْرِیْٗ وَ احْلُلْ عُقْدَةً مِّنْ لِّسَانِیْٗیَفْقَهُوْا قَوْلِیْ۪

ارشادِ باری تعالیٰ ہے: وَإِذَا قِيْلَ لَهُمْ اٰمِنُوْا كَمَآ اٰمَنَ النَّاسُ قَالُوْٓا أَنُؤْمِنُ كَمَاۤ اٰمَنَ السُّفَهَآءُ ۔ أَلاۤ إِنَّهُمْ هُمُ السُّفَهَآءُ وَلَٰكِنْ لَّا يَعْلَمُوْنَ

اور جب ان سے کہا جاتا ہے کہ تم بھی ایسا ہی ایمان لاؤ جس طرح  اور لوگ ایمان لائے ہیں۔ تو کہتے ہیں کیا ہم ویسا ایمان لائیں  جیسا بے وقوف لوگ ایمان لائے ہیں؟ یاد رکھو ! یقیناً وہی بے وقوف ہیں مگر جانتے  نہیں۔

 اس آیتِ کریمہ  میں منافقین  کی ایک اور خصلت و عادت بیان فرمائی گئی کہ جب ان پہ دینِ اسلام پیش کیا جاتا ہے ،جب انہیں ایمان کی دعوت دی جاتی ہے کہ مومنین کی طرح تم بھی ایمان لے لاؤ تو کہتے ہیں ہم ویسا ایمان نہیں لائیں گے  جیسا یہ بے وقوف لوگ لائے ہیں۔ یہ منافقین  کا طرزِ عمل تھا۔

یہاں پہ جو اہم بات ارشاد  فرمائی جا رہی ہے وہ ہے   اٰمِنُوْا كَمَآ اٰمَنَ النَّاسُ ایمان لاؤ جیسا اور لوگ ایمان لائے۔

یہ اور لوگ کون ہیں ؟ کون ہیں جن کے ایمان کو مثال کے طور پہ ،نمونے کے طور پہ پیش فرمایا جا رہا ہے ، جو معیارِ ایمان ہیں دوسروں کے لئے۔ یہ ہستیاں تھیں صحابہ کرام رضوان اللہ علیہم اجمعین کی ۔

قاسمِ فیوضات حضرت مولانا محمد اکرم اعوان ؒ اکرم التفاسیر میں فرماتے ہیں کہ یہ آیت بتا رہی ہے کہ قرآن کے معیاری مسلمان  صحابہ کرام رضوان اللہ علیہم اجمعین ہیں ۔ قرآن کی تفسیر صحابہ کرام رضوان اللہ علیہم اجمعین  کا کردار ہے ، نبی کریم کے ارشادات  کا مفہوم  صحابہ کرام  رضوان اللہ علیہم اجمعین  کا کردار ہے ۔ اب اگر کوئی گرائمر کی رو سے ، منطق کا زور لگا کر  اور صرف و نحو  کا زور لگا کر  مختلف  معنی گھڑنا چاہے تو وہ نا قابلِ قبول  ہونگے۔ پوچھا یہ جائے گا  کہ جو مفہوم اس آیت کریمہ کا آپ بتا رہے ہیں  یا اس حدیث مبارکہ سے جو نتیجہ آپ اخذ کر رہے ہیں  کیا صحابہ کرام  رضوان اللہ علیہم اجمعین   نے بھی یہی سمجھا تھا ۔صرف اس ایک سوال  پہ سارے اختلافات ختم ہو جاتے ہیں ۔ صرف یہ ایک سند ہے  کہ اگر اس پہ سارے متفق ہو جائیں تو سارے اختلافات ختم ہو جاتے ہیں اور اگر کوئی اختلاف رہتا ہے تو وہ جو باعثِ برکت ہے یعنی اس بات کے دو ، چار، پانچ مثبت پہلو ہوتے ہیں ۔

پھر ارشاد ہوتا ہے : قَالُوْٓا أَنُؤْمِنُ كَمَاۤ اٰمَنَ السُّفَهَآءُ  کہتے ہیں ہم ویسا ایمان لائیں جیسا بے وقوف لوگ ایمان لائے ہیں

  انکی  جاہلیت اور کم عقلی کی انتہا دیکھیں کہ ایک طرف تو ایمان نہیں لاتے جیسا صحابہ کرام رضوان اللہ علیہم اجمعین   لائے اور اس پہ انتہا یہ کہ صحابہ رضوان اللہ علیہم اجمعین   کو ،اوّلین مومنین، جن کو قرآن سبقت لے جانے والے فرما رہا ہے ، ان  کو بے وقوف کہ رہے ہیں۔

صحابہ کرام رضوان اللہ علیہم اجمعین    کا یمان کیا تھا فرمایا: وَقَالُوْاسَمِعْنَا وَأَطَعْنَا سنا اور مانا  کوئی حیل و حجت نہیں کی ۔ کوئی عذر، کوئی رشتہ، کوئی تکلیف، کوئی امتحان ان کے رستے کی رکاوٹ نہ بن سکا۔

کوئلوں پہ لٹایا جانا ہو یا  کوڑوں سے مارا جانا، شعبِ ابی طالب کی صعوبتیں ہوں یا اللہ کے دین کیلئے گھر بار چھوڑنا، یہاں تک کہ اللہ کے دین کی سر بلندی کیلئے اپنے سگوں کے مدِ مقابل آگئے، بدر و احد کا میدان سجا تو ایک طرف باپ دوسری طرف بیٹا، ایک طرف چچا تو دوسری طرف بھتیجا، اسلام کی خاطر، اللہ کے دین کی سربلندی کیلئے ، اطاعتِ محمد الرسول اللہ ﷺ میں کسی رشتے کی پرواہ نہیں کی۔ ایک صحابی کو ان کے باپ نے کہا کہ تم میری تلوار کی زد میں آئے  لیکن میں نے وار نہیں کیا  تو انہوں نے فرمایا کہ آپ اگر میری تلوار کی زد میں آتے تو میں نہیں چھوڑتا ۔

صحابہ کرام رضوان اللہ علیہم اجمعین   کا  ایمان ، انکا عشقِ رسولﷺ، انکی اطاعت ناقابلِ بیان ہے ۔

فرمایا جا رہا ہے کہ ان جیسا ایمان لاؤ، ان کے نقشِ قدم پہ چلو، ان کی پیروی اختیار کرو، قرآن و حدیث کا وہ مطلب جو انہیں سمجھایا گیا ہے ، جو انہوں نے اختیار کیا ، جس پہ انہوں نے عمل کر کے دکھایا تم بھی ویسے اختیار کرو۔

آج کل کہا جاتا ہے کہ وہ تو صحابہ تھے ہم ایسا کرنے سے قاصر ہیں ، ہم میں اتنی صلاحیت نہیں۔شیخ المکرم حضرت  امیر عبد القدیر اعوان مد ظلہ العالی فرماتے ہیں کہ اس سے بڑا کفر کیا ہو گا ۔ اس سوچ کا اس جملے کا مطلب یہ ہوا کہ شریعتِ  مطہرہ جو قرآن و حدیث کی صورت میں عطا کی گئی ، جس کے مطابق نبی رحمت ﷺ نے صحابہ کرام رضوان اللہ علیہم اجمعین    کی جماعت تیار کی اور انہوں نے عملاً اسے اختیار کیا  اور تین چوتھائی روئے زمین کے حصے پہ اسے نافذ کر کے دکھایا۔ وہ نعوذباللہ ناقابل عمل ہے  دورِ حاضر میں عملی طور پہ اسے اختیار نہیں کیا جا سکتا۔

مقامِ صحابہ اتنا بلند ہے  کہ اگر روئے زمین کی تمام عبادتیں ، تمام ریاضتیں  اکٹھی بھی کر لی جائیں  تو ادنیٰ ترین صحابی کی شان کا بھی مقابلہ نہیں کر سکتیں۔ لیکن عملاً اختیار کرنا ویسے ہی  کرنا  ہو گا جیسے صحابہ نے کیا، معیارِ ایمان صحابہ ہی ہوں گے کیونکہ قرآن نے  ایمان کا معیار، اللہ تعالیٰ نے ایمان کا معیار صحابہ کو بنایا۔ کوئی کہاں تک پہنچتا ہے   یہ اس کا نصیب ۔ کوئی صحابہ جیسا ایمان تو نہیں پا سکتا لیکن معیار ایمان وہی رہیں گے۔

منافقین جب ان کے بارے کہ رہے ہیں  کہ یہ تو بے وقوف ہیں (نعوذ باللہ ) تو ارشاد فرمایا گیا:

أَلاۤ إِنَّهُمْ هُمُ السُّفَهَآءُ وَلَٰكِنْ لَّا يَعْلَمُوْنَ خوب غور سے سن لو یقیناً یہی بے وقوف ہیں لیکن  یہ علم نہیں رکھتے

خود اللہ نے ان  منافقین کا فیصلہ بھی فرما دیا اور کیا ہی خوبصورت فیصلہ فرمایا کہ جو ان کے ساتھ جو معاملہ رکھے گا میں اللہ تعالیٰ بھی اس کے ساتھ ویسا ہی معاملہ رکھوں گا  جو بھی ان پہ زبان درازی کرے گا ، جو بھی انکو  تنقید کا نشانہ بنائے گا یا ان کی شان میں گستاخیاں کرے گا تو اللہ تعالیٰ بھی اس کے ساتھ ویسا معاملہ فرمائیں گے جیسے اس آیتِ کریمہ میں بیان ہوا کہ انہوں نے کہا کہ یہ بے وقوف ہیں تو اللہ فرما رہا ہے یقیناً یہی بے وقوف ہیں  اور پھر صرف بے وقوف نہیں جاہل بھی ہیں  ولکن الا یعلمون وہ اس کا علم بھی نہیں رکھتے کیونکہ اگر کسی کو اپنی بے وقوفی کی سمجھ آجائے، کسی کو یہ پتہ چل جائے کہ میں غلط ہوں تو وہ درستگی کی کوشش کرے گا، درست راستہ تلاش کرے گا  لیکن اگر کسی کو علم ہی نہیں کہ وہ غلط سمت پہ جا رہا ہے تو  ممکن ہی نہیں کہ وہ درست راہ پہ آئے۔ تو فرمایا کہ یہ علم نہیں رکھتے۔

پھر ایک اور اہم نکتہ یہ سمجھ آتا ہت اس آیتِ کریمہ سے کہ سابقہ آیت میں فرمایا الکن لا تشعرون کہ وہ شعور نہیں رکھتے جبکہ یہاں فرمایا جا رہا ہے ولکن لا یعلمون وہ علم نہیں رکھتے ۔ شعور علم کے بعد کا درجہ ہے فہم و ادراک علم ہونے کے بعد آتا ہے  جبکہ علم ادنیٰ درجہ ہے اور جس کو علم ہی نہیں وہ سمجھ و عقل اور فہم و ادراک تک تو جا ہی نہیں سکتا تو جب معاملہ اصحابِ محمد الرسول اللہ ﷺ کا آیا، جب  بات اللہ کے پیاروں اور نبی ﷺ کے وفاداروں  پہ آئی، جب انگلی  دین میں اسلام میں سبقت لے جانے والوں پہ اٹھی  تو  جاہلیت کا  شعور سے بھی ادنیٰ درجہ  یعنی لا علمی ارشاد فرمایا۔

اللہ تعالیٰ ہمیں دین اسلام کی حقیقی سمجھ عطا فرمائے۔

اللہ تبارک وتعالیٰ ہمیں صراطِ مستقیم سمجھنے اس پہ عمل کرنے اور تا دم آخر اس پہ قائم رہنے کی توفیق و ہمت عطا  فرمائے۔

آمین یا رب العالمین

دعاؤں کا طالب

ابو محمد زبیر اویسی

مکمل تحریر >>>

منافق کا مطلب اور منافقین کی اقسام۔کیا منافقین دورِ حاضر میں بھی موجود ہیں؟

 اَلحمدُ للہِ وَحدَہُ ، وَالصَّلاۃُ والسَّلامُ علَی مَن لاَّ نَبِیَّ بَعدَہُ ، أمَّا بعدُ : فاَعُوْذُ بِاللّٰہِ مِنَ الشَّیْطٰنِ الرَّجِیْمِ، بِسمِ اللّٰہِ الرَّحْمٰنِ الرَّحِیْمِ۔

رَبِّ اشْرَحْ لِیْ صَدْرِیْٗ وَ یَسِّرْ لِیْۤ اَمْرِیْٗ وَ احْلُلْ عُقْدَةً مِّنْ لِّسَانِیْٗیَفْقَهُوْا قَوْلِیْ۪

سورۃ  البقرہ کی آیت نمبر 8 سے 20 تک چونکہ منافقین کے بارے میں ہیں تو ان آیات کی تفسیر و تشریح سے پہلے ہم نفاق اور منافقین کے بارے میں گفتگو کریں گے۔

منافق کون ہوتا ہے؟

                   جو  شخص ظاہراً تو خود کو مسلمان ظاہر کرے لیکن وہ دل سے کفریہ عقائد پہ قائم ہو  یا اسلامی عقائد کے بارے میں شک و شبہ میں مبتلا ہو، یعنی دل سے یقین نہ رکھتا ہو ایسے شخص  کو شریعتِ اسلامی میں منافق کہا جاتا ہے۔

نفاق دو طرح کا ہوتا ہے:

1۔ اعتقادی نفاق :

                        اعتقادی نفاق یہ ہے کہ ظاہراً تو خود کو مسلمان ظاہر کرے لیکن درپردہ کفر پہ  قائم ہو ۔ منافق اعتقادی کے کفر میں کوئی شبہ نہیں ہوتا۔

 اس قسم کے منافقین کا پہلا اور بڑا گروہ مدینہ میں ظاہر ہوا جن کی اکثریت یہود تھی لیکن وہ خود کو مسلمان ظاہر کرتے تھے اور نہ صرف اسلام کے خلاف کفر کی مختلف سازشوں کا حصہ ہوتے تھے  بلکہ کئی موقعوں پر انہوں نے مسلمانوں کو نقصان بھی پہنچایا۔

 نفاق چونکہ دل کا معاملہ ہے یہ سب پہ ظاہر تو نہیں ہوتا  لیکن اللہ تعالیٰ دل کے حال جانتا ہے  اور منافقین ِ مدینہ کے معاملے میں بھی  اللہ نے حضورعلیہ الصلوۃ و السلام کو آگاہ فرمایا۔ سورۃ البقرہ کی یہ تیرہ آیات  براہِ راست ان لوگوں کے بارے میں ہی ہیں جن میں اللہ تبارک وتعالیٰ نے ان کا معاملہ واضح اور کھول کر بیان فرما دیا۔

دورِ حاضر میں بھی ایسے لوگوں کا انکشاف ہوتا رہتا ہے جو حقیقت میں تو کافر ہوتے ہیں  لیکن کئی کئی سال تک مسلمانوں کی صفوں میں گھسے رہتے ہیں  اور مسلمانوں کے لئے بہت بڑے بڑے نقصانات کا باعث بنتے ہیں البتہ کوئی دوسرا ان کا معاملہ تب تک نہیں جان سکتا جب تک  اللہ ان کا معاملہ ظاہر نہ فرما دیں یا وہ خود کھل کر سامنے نہ آ جائیں۔

2۔ عملی نفاق:

                        اس قسم کا منافق عقیدے کے لحاظ سے تو پکا مسلمان ہوتا ہے  لیکن اس کا عمل منافقین جیسا ہوتا ہے، اس کی عادات و اطوار منافقین سے ملتے جلتی ہوتی ہیں۔ اس قسم کو عملی نفاق کہتے ہیں۔ اور ایسا شخص عملی منافق ہوتا ہے۔ اس قسم کے لوگ ہمارے معاشرے میں کثرت سے ملتےہیں جو باوجود علم و شعور رکھنے کے  اور ایمان و اسلام کے دعویٰ کے بے عمل ہیں۔

مثلاً بے نمازی شخص  جو مانتا بھی ہے، نماز کی اہمیت کو جانتا بھی ہے ، نتائج سے بھی آگاہ ہے  لیکن نماز نہیں پڑھتا۔ بلکہ میں نے یہاں تک لوگوں سے سنا ہے کہ ہم کمزور ہیں سست ہیں یا وقت نہیں ہمارے پاس مصروفیات بہت زیادہ ہیں، اللہ بڑا غفور و رحیم ہے ، معاف فرما دے گا۔سو د کی حرمت کا اور اس کے نقصانات کا بھی اندازہ ہے پھر بھی باز نہیں آتے یعنی اللہ تبارک وتعالیٰ اور اس کے رسول ﷺ سے اعلانِ جنگ کرکے یہ لوگ پھر اس کے جائز ہونے کی دلیلیں گھڑ رہے ہوتے ہیں،حق تلفی معاشرہ کا عام وطیرہ بن چکی ہے جس کے پاس طاقت و اختیار ہے وہ دوسرے کی حق تلفی اپنا حق سمجھتا ہے ۔وراثت میں عورتوں کا حصہ نہیں اور کہا جاتا ہے کہ ہم نے بہنوں ،بیٹیوں کو پہلے ہی بہت کچھ دے دیا ہے کیا یہ کافی نہیں۔ حیرانگی کی بات ہے کہ جو اللہ کی نافرمانی پہ ڈٹ چکا ہے، فکر ہی نہیں اپنی بے عملی کی اور خود کو نفس کے اور شیطان کے اس بہکاوے میں مبتلا کر رکھا ہے کہ اللہ بڑا غفور و رحیم ہے ہماری بے عملی کو معاف فرما دے گا ۔ بلا شبہ مغفرت اس کی رحمت سے ہے وہ جس کی چاہے مغفرت فرما دے۔ لیکن خود کو اس کی مغفرت کے قابل تو بنانے کی کوشش کرنی چاہیئے، مقدور بھر اس کے احکامات پہ عمل کرنے کی تو کوشش و جستجو ہو۔ سب کچھ سرے سے چھوڑ کر  بے عملی کی زندگی گزارنا اور پھر اس کی رحمت کی طلب رکھنا تو صرف ایک بہکاوا ہے۔ جو نفس و شیطان ہمارے دل میں ڈالتا ہے۔

یہ عملی نفاق ہے جس سے دورِ حاضر میں بچنا انتہائی مشکل بھی ہےلیکن اتنا ہی ضروری بھی ہے۔ ایسے شخص کو ہم منافق تو نہیں کہیں گے کیونکہ نفاق کا تعلق دل سے ہے اور دل کا حال اللہ تعالیٰ ہی جانتے ہیں  لیکن اس طرح کا کردار جو منافق کا ہوتا ہے اگر ہمارا ہو تو ممکن نہیں کہ ایمان سلامت رہے۔

آپ علیہ الصلوۃ و السلام کا فرمان ِ عالی شان ہے کہ : زنا کرنے والا زنا کرتے وقت مومن ہونے کی حالت میں زنا نہیں کرتا،  چور چوری کے وقت ایمان کی حالت میں چوری نہیں کرتا،شرابی شراب پیتے وقت ایمان کی حالت میں شراب نہیں پیتا، لوگوں کا مال لوٹنے والا مال لوٹتے وات ایمان کی حالت میں مال نہیں لوٹتا  اور تم میں جب کوئی خیانت کرے تو  مومن ہونے کی حالت میں خیانت نہیں کرتا پس تم ان چیزوں سے بچو۔

اس حدیث ِ مبارکہ سے ثابت ہوتا ہے کہ گناہ کے  ارتکاب کے وقت  انسان ایمان سے محروم ہو جاتا ہے اور اگر وہ توبہ نہ کرے اور  ہمیشہ ہمیشہ کیلئے کسی ایسے گناہ میں پھنس جائے یعنی گناہ کو متواتر اختیار کر لے تو پھر ایمان کا باقی رہنا نا ممکن ہے۔

اللہ تبارک وتعالیٰ ہمیں صراطِ مستقیم سمجھنے اس پہ عمل کرنے اور تا دم آخر اس پہ قائم رہنے کی توفیق و ہمت عطا  فرمائے۔

آمین یا رب العالمین

دعاؤں کا طالب

ابو محمد زبیر اویسی

مکمل تحریر >>>

تفسیر سورۃ البقرہ - آیت نمبر 11,12 - فساد کا مفہوم و مطلب - دورِ حاضر کے فسادی اور فساد کیوجہ

 

اَلحمدُ للہِ وَحدَہُ ، وَالصَّلاۃُ والسَّلامُ علَی مَن لاَّ نَبِیَّ بَعدَہُ ، أمَّا بعدُ : فاَعُوْذُ بِاللّٰہِ مِنَ الشَّیْطٰنِ الرَّجِیْمِ، بِسمِ اللّٰہِ الرَّحْمٰنِ الرَّحِیْمِ۔

رَبِّ اشْرَحْ لِیْ صَدْرِیْٗ وَ یَسِّرْ لِیْۤ اَمْرِیْٗ وَ احْلُلْ عُقْدَةً مِّنْ لِّسَانِیْٗیَفْقَهُوْا قَوْلِیْ۪

ارشادِ باری تعالیٰ ہے: وَإِذَا قِيلَ لَهُمْ لَا تُفْسِدُوا فِي الْأَرْضِ قَالُوا إِنَّمَا نَحْنُ مُصْلِحُونَ

اور جب ان سے کہا جاتا ہے کہ زمین میں فساد نہ کرو تو کہتے ہیں کہ ہم تو اصلاح کرنے والے ہیں

قاضی ثناءاللہ مظہری پانی پتی ؒ  تفسیری مظہری میں فرماتے ہیں کہ " فساد ضد ہے صلاح کی اور یہ دونوں لفظ ہر قسم کی ضرر دینے والی اور نفع بخشنے والی چیزوں کو  عام  ہیں یعنی فساد کا لفظ ہر قسم کی  تکلیف اور نقصان دینے والی چیزوں  کیلئے جبکہ صلاح کا لفظ ہر قسم کی مفید اور نفع بخش چیزوں کیلئے ہے۔"

شیخ عبد الحق ھقانی دہلوی ؒ تفسیر ِ حقانی میں فرماتے ہیں " کسی شے کا اعتدال سے باہر ہونا  اور جو نفع کہ اس سے خیال کیا جاتا ہے اسکے قابل نہ رہنا  اور اسکی ضد صلاح ہے یعنی جس طرح فساد کے معنوں میں بگڑنا ہے اسی طرح صلاح کے معنوں میں سنورنا معتبر ہے۔"

قاسمِ فیوضات حضرت مولانا محمد اکرم اعوان ؒ اکرم التفاسیر میں بیان فرماتے ہیں کہ" جو شخص اپنے طریقے سے یا اپنی خیال کے مطابق  اپنی رائے سے اصلاح کرنا چاہتا ہے اور اسکی رائے اللہ تبارک وتعالیٰ اور اللہ کے نبی ﷺ کے ارشادات کے خلاف ہوتی ہے، وہ ایک فساد پیدا کرتی ہے۔"

مزید فرماتے ہیں کہ انسان جو چیز بناتا ہے  اس کے استعمال کا ایک قاعدہ ہے۔ ایک مکان بنایا گیا اس میں کھڑکیاں بھی ہیں ، روشن دان بھی ہیں ، دروازے بھی ہیں ۔ اس کے اندر داخلے کیلئے دروازہ رکھا جاتا ہے  اب کوئی کہے کہ روشندان میں بھی جگہ ہے میں سیڑھی لگا کر روشندان سے داخل ہو جاؤں گا اور پھر اس سے نکل جاؤں گا  تو یہ فساد ہو گا ، مصیبت پیدا کرے گا، صحیح طریقہ نہیں ہو گا۔

جس قادرِ مطلق نے کائنات بنائی ہے  اس میں اس میں رہنے سہنے کے، ہر کام کے طریقے اور راستے مقرر  فرمائے ہیں  جو نبی کریم ﷺ نے وضاحت سے ارشاد فرما دیئے ہیں ۔ اسلام کا صرف زبانی فلسفہ ہی نہیں ارشاد فرمایا گیا  بلکہ اللہ کریم نے حضور علیہ الصلٰوۃ و السلام کو  صحابہ کی ایسی مبارک جماعت عطا فرمائی جس نے حضور ﷺ کے سامنے اللہ تعالیٰ کے  احکامات پہ عمل کیا  اور حضورﷺ نے تصدیق فرمائی۔

دورِ حاضر میں ہمیں ہر طرف فساد اور بگاڑ  دکھائی دیتا ہے اس کا بنیادی سبب کیا ہے ؟ بنیادی سبب یہ ہے کہ لوگوں نے اپنی عقل اور ناقص رائے پہ  عمل شروع کر دیا ہے ۔ ارشاداتِ الٰہی کو ، ان ضابطوں کو جو رسول اللہ ﷺ نے ارشاد فرمائے اور صحابہ کرام رضوان اللہ علیہم اجمعین نے کر کے دکھائے، انہیں چھوڑ دیا ہے۔

یہاں جو قابلِ غور بات یہ کہ کہ جن لوگوں کے بارے میں یہ بات بیان فرمائی جا رہی ہے  وہ منافقین ہیں کیونکہ کفار کا فساد تو کوئی ڈھکی چھپی چیز نہیں  لیکن جو منافقین کا فساد ہے وہ خطرناک بھی ہے اور اسے سمجھنے کی ضرورت ہے۔ کیونکہ دورِ حاضر میں ہم کسی کو شرعاً منافق تو نہیں کہ سکتے ، وحی الٰہی کا سلسلہ بند ہو چکا اور نہ اب کوئی نبی آئے گا تو کوئی دوسرا ذریعہ نہیں کہ ہم کسی کی نفا ق کو جان سکیں ، اب ان لوگوں کو منافق نہیں بلکہ فاسق کہا جائے گا جن میں منافقین کی علامات پائی جاتی ہیں۔ اور ایسے لوگ چونکہ اسلام کے لبادے میں ہوتے ہیں اسلام کے نام سے پہچانے جاتے ہیں ، خود کو مسلمان کہلواتے ہیں  لیکن یہ خصلتیں یہ عادات و اطوار جو ان تیرہ آیات میں بیان ہوئیں اور اس کے بعد اور بھی بہت سے قرآنی آیات اور احادیث میں بیان فرمائی گئیں ، یہ بتائیں گی  یہ نشانیاں ایسے لوگ کی شناخت کریں گی اور یہ ہی واحد ذریعہ ہے ایسے لوگوں کی حقیقت جاننے کا اور ان سے بچنے کا ۔ اور نہ صرف ایسے لوگوں کو پرکھنے کا بلکہ خود کو بھی ان تیرہ آیت کو سامنے رکھ کر پرکھنا چاہیئے کہ جو علامات منافقین کی بیان ہوئیں کہیں وہ ہم میں تو نہیں پائی جاتیں۔

اس آیتِ کریمہ میں جو بات بیان فرمائی گئی کہ جب ان سے کہا جاتا ہے کہ زمین میں فساد نہ کرو تو کہتے ہیں کہ ہم تو اصلاح کرنے والے ہیں   تو آپ غور فرمائیں تو آپ کو آسانی سے سمجھ آ سکتا ہے کہ دورِ حاضر میں ایسے لوگ بکثرت پائے جاتے ہیں جو دین ِ اسلام میں  اپنے رائے اور پسند و ناپسند کو شامل کر رہے ہوتے ہیں ،  تفرقہ بازی پھیلا کےلوگوں کے درمیان دوریاں اور نفرتیں پیدا کر رہے ہوتے ہیں،  قرآن و احادیث کو اپنی مرضی کے معانی و مفاہیم پہنا کے لوگوں  کے  عقائد و اعمال کو خراب  کر رہے ہوتے ہیں، مزاروں اور پیر خانوں پہ جائیں تو  عقیدت و محبت کہ نام پہ لوگوں کو مختلف قسم کی شرکیہ و کفریہ رسومات میں الجھایا ہوتا ہے ۔ خود ساختہ  اسلامی سکالر  ز کا روپ دھار کے  ایسے مسائل جن پہ اجماعِ امت ہے  اکابریں سے لے اب تک کے علماءِ دین متفق ہیں ، ان کو موضوع بحث بنا کر ، اکابرین اور ائمہ دین کے محققانہ اور فروعی  اختلافات کو تنازعات کا روپ دے رہے ہوتے ہیں اور جعلی پیروں اور عاملوں  کو موضوع بنا کر تصوف و طریقت جیسے بنیادی علوم دین کا انکار کر رہے ہوتے ہیں اور جب ان سے کہا جاتا ہے کہ  آپ فساد پھیلا رہے ہو تو کہتے ہیں ہم تو اصلاح کر رہے ہیں ، ہم تو لوگوں کو اصل دین بتا رہے ہیں ، ہم تو لوگوں کو صراطِ مستقیم پہ لا رہے ہیں ۔

حیرانگی کی بات ہے کہ امت جس پہ چودہ سو سال سے متفق ہے اور ایک بندہ چودہ صدیوں بعد پیدا ہوا اور کہتا ہے کہ میں لوگوں کو اصل دین سمجھا رہا ہوں تو کیا چودہ سو سال سے جو علمائے امت، ائمہ دین ، اکابرینِ امت کے درمیان متفق علیہ  ہے وہ غلط ہے ، وہ درست نہیں اور جو تو بتا رہا ہے وہ درست ہے تو کیا ممکن ہے کہ یہ امت چودہ سو سال سے گمراہی پہ تھی اور اب تو اصلاح کرنے آگیا ہے ۔ حقیقت میں انہی لوگوں کے بارے میں فرمای جا رہا ہے کہ جب ان سے کہا جاتا ہے کہ فساد نہ پھیلاؤ تو کہتے ہیں کہ ہم تو اصلاح کرنے والے ہیں۔

شاہ ولی اللہ رحمتہ اللہ علیہ فرماتے ہیں کہ میں روزہ رسول ﷺ پہ حاضر ہوا اور میں نے اجتہاد کی اجازت چاہی  تو آپ ﷺ نے فرمایا کہ شاہ ولی اللہ غور کرو اگر ائمہ اربعہ (امام ابو حنیفہ ؒ، امام مالک ؒ، امام شافعی ؒ ، امام حنبل ؒ )نے کوئی کمی چھوڑی ہے تو تمہیں اجازت ہے۔یہ ایک کشفی معاملہ تھا کوئی اس پہ یقین کرے نہ کرے اس کی مرضی لیکن اس کے بعد جو اہم بات وہ فرماتے ہیں کہ میں نے غور کیا کہ کیا کسی معاملے میں کوئی کمی ہے جس پہ میں اپنی اجتہادی رائے پیش کروں تو غور کرنے پہ معلوم ہوا کہ کوئی معاملہ ایسا نہیں جس میں ائمہ اربعہ نے کوئی کمی چھوڑی ہو ۔

شاہ ولی اللہ رحمتہ اللہ علیہ جیسی عظیم ہستی جنہوں نے روئے زمین پہ پہلی بارمکمل قرآن کریم کا کسی اور زبان( فارسی) میں ترجمہ کیا پھر ان کے بیٹوں  شاہ عبد القادر ؒ اور شاہ رفیع الدین ؒ نے  سب سے پہلے اردو ترجمہ کیا ۔ اتنی بڑی بڑی ہستیوں نے بھی جن ائمہ اربعہ کی شان بیان فرمائی ہو۔ انہیں تنقید کا نشانہ نہیں بنایا بلکہ فرمایا کہ انہوں نے کسی مسئلے میں  کوئی کمی نہیں چھوڑی۔ تو اگر کوئی دورِ حاضر میں نام نہاد مذہبی سکالر اور  ملّا اتنی بڑی بڑی ہستیوں ، ائمہ  کرام، علمائے کرام ،فقہائے کرام،صوفیائے کرام ، اولیائے کرام ، تابعین ، تبع تابعین اور  صحابہ کرام رضوان اللہ علیہماجمعین تک کو معاف نہ کرے اور ان کو تنقید کا نشانہ بنائے یا ان کے علوم کا رد کر کے خود کو بہت بڑا عالم تصور کرے، ان کے فروعی اختلافات کا مذاق اڑائے  اور دعویٰ اصلاح کا کرے تو ایسے لوگوں سے بچنا چاہیئے کیونکہ قرآن ان کے فساد پہ مہر ثبت کر رہا ہے فرمایا گیا :

 أَلَا إِنَّهُمْ هُمُ الْمُفْسِدُونَ وَلَكِنْ لَا يَشْعُرُونَ

یقیناً یہی لوگ فساد کرنے والے ہیں لیکن وہ اس کا شعور نہیں رکھتے۔

حسد، بغض و عناد، کینہ پروری،اپنی علمی قابلیت کا گھمنڈ و غرور اور تکبر کا شکار ، اور پھر گستاخانہ طرز تکلم اور انداز  کی وجہ سے ان کا شعور ، انکا فہم و ادراک ، انکی عقل و سمجھ باقی نہیں رہی  ۔ اور یہ دعویٰ اصلاح کا کر رہے ہیں جبکہ حقیقت میں یہ فسادی ہیں۔ دینِ اسلام کے وہ پہلے جن پہ چودہ سو سال سے امت کا اجماع ہے اور امت متفق چلی آرہی ہے ، جن کےبارے میں امت میں کوئی اختلاف نہیں، انہی معاملات کے بارے میں یہ اپنی ایک الگ رائے گھڑ رہے ہیں اور کہتے ہیں کہ ہم اصلاح کر رہے ہیں حقیقتاً یہ ہی اصل فسادی ہیں۔

اللہ تبارک و تعالیٰ ہماری ان سے حفاظت فرمائے۔

اللہ تبارک وتعالیٰ ہمیں صراطِ مستقیم سمجھنے اس پہ عمل کرنے اور تا دم آخر اس پہ قائم رہنے کی توفیق و ہمت عطا  فرمائے۔

آمین یا رب العالمین

دعاؤں کا طالب

ابو محمد زبیر اویسی

مکمل تحریر >>>

تفسیر سورۃ البقرہ - آیت نمبر 8،9،10 - منافقین کی علامات - دورِ حاضر میں بکثرت پائی جانے والی علاماتِ منافقین - اللہ اور مومنین سے دھوکہ اور دلوں کی بیماری کا مطلب

 اَلحمدُ للہِ وَحدَہُ ، وَالصَّلاۃُ والسَّلامُ علَی مَن لاَّ نَبِیَّ بَعدَہُ ، أمَّا بعدُ : فاَعُوْذُ بِاللّٰہِ مِنَ الشَّیْطٰنِ الرَّجِیْمِ، بِسمِ اللّٰہِ الرَّحْمٰنِ الرَّحِیْمِ۔

رَبِّ اشْرَحْ لِیْ صَدْرِیْٗ وَ یَسِّرْ لِیْۤ اَمْرِیْٗ وَ احْلُلْ عُقْدَةً مِّنْ لِّسَانِیْٗیَفْقَهُوْا قَوْلِیْ۪

ارشادِ باری تعالیٰ ہے: وَمِنَ النَّاسِ مَنْ يَقُولُ آمَنَّا بِاللَّهِ وَبِالْيَوْمِ الْآخِرِ وَمَا هُمْ بِمُؤْمِنِينَ[8] يُخَادِعُونَ اللَّهَ وَالَّذِينَ آمَنُوا وَمَا يَخْدَعُونَ إِلَّا أَنْفُسَهُمْ وَمَا يَشْعُرُونَ[9] فِي قُلُوبِهِمْ مَرَضٌ فَزَادَهُمُ اللَّهُ مَرَضًا وَلَهُمْ عَذَابٌ أَلِيمٌ بِمَا كَانُوا يَكْذِبُونَ[10]

اور کچھ لوگ ایسے ہیں جو کہتے ہیں کہ ہم اللہ پر اور آخرت کے دن  پر ایمان رکھتے ہیں حالانکہ وہ ایمان نہیں رکھتے۔

یہاں جو پہلی قابلِ غور بات ہے وہ یہ ہے کہ فرمایا وَمِنَ النَّاسِ یعنی عام عوام، لوگ ۔کوئی تخصیص نہیں فرمائی  کہ یہود،نصاری، منافقین، کفار، مشرکین  وغیرہ کیونکہ جن لوگوں کا بیان ہو رہا ہے  ان کی تخصیص ہو ہی نہیں سکتی   ان کی شناخت ہی یہ ہے کہ ظاہراً کوئی انہیں پہچان نہیں سکتا  یا تو ان کے دل کا حال اللہ جانتا ہے یا پھر انکے اعمال اس کی گواہی دیں گے ۔ پھر اس کے بعد کے الفاظ ہیں مَنْ يَقُولُ کہ جو کہتے ہیں یعنی زبان سے اقرار کرتے ہیں،  زبانی جمع خرچ کرتے ہیں ، زبان سے بڑے بڑے دعویٰ کرتے ہیں  کیا کہتے ہیں آمَنَّا بِاللَّهِ وَبِالْيَوْمِ الْآخِرِ کہتے ہیں کہ ہم اللہ پر اور یومِ آخرت پر ایمان رکھتے ہیں  وَمَا هُمْ بِمُؤْمِنِينَ  حالانکہ وہ مومن نہیں ۔کیوں مومن نہیں  ؟ اس لئے کہ ان کا یہ دعویٰ صرف زبانی ہے  ان کا دل اس بات کا قائل نہیں کیونکہ اگر ان کا دل بھی اس بات کا قائل ہوتا تو ضرور یہ اس کے مطابق عمل بھی اختیار کرتے جبکہ ان کے اعمال اس کے بر عکس ہیں۔

ا س آیت کا شان ِ نزول تو بنیادی طور  پہ منافقینِ مدینہ سے متعلق ہے  لیکن ہم اگر غور  کریں تو دور حاضر میں  یہ چیز عام دیکھنے کو ملتی ہے  کہا جاتا   ہے کہ ہمارا اللہ پہ بڑا یقین ہے  اور آخرت بر حق ہے  ضرور ایک دن موت آنی ہے ، قبر اور محشر کی سختیوں کا بھی   اقرار کیا جاتا ہے ، محبتِ رسول ﷺ کے بلند و بانگ دعوے، محافل و مجالس اور جلوسوں پہ کروڑوں روپے خرچ کر دیئے جاتے ہیں، مسجدوں کے احترام کی پرواہ کیے بغیر بڑے بڑے اسپیکر اور ساؤنڈ سسٹم لگا کر محافل منعقد کی جاتی ہیں  لیکن عملی زندگی کو دیکھا جائے تو اطیعو اللہ و اطیعو الرسول کی ایک معمولی جھلک بھی دکھائی نہیں دیتی، زندگی قرآن و سنت کے منافی گزاری جا رہی ہوتی ہے بلکہ جب تک زبان سے نہ بتایا جائے پتہ ہی نہیں چلتا کہ یہ بندہ مسلمان ہے یا کسی اور مذہب کا۔

آپﷺ کا ارشادِ گرامی ہے ۔ عبد اللہ بن عمر رضی اللہ عنہ سے روایت ہے  فرمایا:

من تشبہ بقوم فھو منھم (جو کسی قوم کی شباہت اختیار کرتا ہے  وہ اسی میں سے ہے)

 کتنا سخت حکم اور قابل فکر معاملہ بیان ہوا ہے اس حدیث ِ مبارکہ میں، یعنی جو زبان سے تو کہتا ہے کہ میں مسلمان ہوں لیکن اس کی شکل ، اس کی چال ڈھال، اس کا رہن سہن اور بود و باش، اس کا طرزِ زندگی مسلمانوں جیسا نہیں بلکہ کسی اور قوم کے جیسا ہے تو وہ  مسلمانوں میں سے نہیں بلکہ اس قوم میں سے ہے۔ اور اس کی سب سے بڑی مثال ہمارے ہاں بر صغیر پاک و ہند میں ملتی ہے ۔کہ یہاں کے مسلمان مختلف قوموں کا امتزاج ہیں ۔ شکل و لباس میں ہم انگریزوں(یہود و نصاری ) کی نقل کرنے کی کوشش کرتے ہیں بلکہ جو اپنے روایتی  اور قومی لباس کو ترک کر کے انگریزی لبادے اوڑھتا ہے اسے جدت پسند اور ڈیسنٹ کہا جاتا ہے ۔ تہذیب ہماری ساری کی ساری ہندوانہ ہے ، مذہبی تہواروں کو بھی ہندوانہ رنگ دے دیا گیا ہے  جس طرح ہندو مت میں ہولی و دیوالی وغیرہ کے تہوار منائے جاتے ہیں اسی طرح ہم نے بھی تہوار ایجاد کر لئے حالانکہ اسلام میں عیدین کے علاوہ کوئی تہوار سنتِ رسولﷺ اور خیر القرون سے ثابت نہیں، بزرگانِ دین کے مزاروں پر طرح طرح کی ہندوانہ رسومات کی جاتی ہیں ،شادی بیاہ اور فوتگی و غمی کی رسومات ساری کی ساری ہندوانہ ہیں  اگر کوئی نہ کرنے کی بات کر ے تو کہا جاتا ہے کہ اس سے ہماری ناک کٹ جائے گی۔ قاسمِ فیوضات حضرت مولانا اکرم اعوان رحمتہ اللہ  علیہ فرمایا کرتے تھے کہ کٹنے دو ایسی ناک کو جو محمد رسول اللہ کی اطاعت کی وجہ سے کٹتی ہے ، ایسی ناک کا کٹ جانا ہی بہتر ہے۔

یہی بات اس آیت ِ کریمہ میں بتائی جا رہی ہے کہ جو زبان سے تو کہتے ہیں کہ ہم اللہ تعالیٰ پر اور آخرت کے دن پر یقین رکھتے ہیں  حالانکہ وہ ایمان نہیں رکھتے کیونکہ اگر ایمان رکھتے ہوتے تو  ہر گز اللہ تبارک وتعالیٰ کے احکامات کے خلاف نہ چلتے، اللہ تعالیٰ کی نافرمانی نہ کرتے، سنتِ محمد الرسول اللہﷺ کو نہ چھوڑتے، اگر اللہ جل جلالہ کے حضور روز ِ آخرت کو پیش ہونے کا یقین ہو  تو  کیسے ممکن ہے کہ اللہ کی نافرمانی کی جائے، کیسے اس ذاتِ برحق کے احکامات سے روگردانی کی جائے۔ یہ سارا معاملہ اس وجہ سے ہے کہ یہ صرف زبان سے کہتے ہیں کہ ہمارا اللہ تعالیٰ اور روزِ آخرت پہ یقین ہے حقیقت میں انہیں یہ یقین حاصل نہیں اسی لئے فرمایا گیا : وماھم بمومنین یہ ایمان نہیں رکھتے،

پھر ارشاد ہوتا ہے:

 يُخٰدِعُونَ اللَّهَ وَالَّذِينَ آمَنُوا وَمَا يَخْدَعُونَ إِلَّا أَنْفُسَهُمْ وَمَا يَشْعُرُونَ

اللہ کو اور مومنوں کو دھوکہ دینا چاہتے ہیں مگر(درحقیقت) وہ سوائےئ اپنے آُ کے کسی کو دھوکہ نہیں دے رہے۔

یہ لوگ اپنے اس کردار سے ، اپنی اس نقالی سے سمجھتے ہیں کہ ہم  ظاہراً مسلمان بن کر اللہ تعالیٰ کو اور مومنین کو چکما دے لیں گے، تو اللہ تبارک وتعالی  فرماتے ہیں وَمَا يَخْدَعُونَ إِلَّا أَنْفُسَهُمْ یہ دھوکہ نہیں دے سکتے کسی کو سوائے اپنے آپ کے، یہ خود کو دھوکہ دے رہے ہیں ، یہ اپنے لئے جہنم کا ایندھن اکٹھا کر رہے ہیں ، یہ خود اس بہکاوے  اور دھوکے میں پڑے ہیں ۔فرمایا:  وَمَا يَشْعُرُونَ یہ شعور نہیں رکھتے، یہ سوجھ بوجھ اور سمجھ نہیں رکھتے۔یہ کم فہمی اور کم عقلی کا شکار ہیں۔ اور اس کی  وجہ کیا ہے؟ یہ بات اگلی آیتِ کریمہ میں بیان ہوئی فرمایا: فِي قُلُوبِهِمْ مَرَضٌ ان کے دلوں میں بیماری ہے۔ اور یہ بیماری نفاق ہے۔ اس سے یہ بات بھی سمجھ آتی ہے کہ سوجھ بوجھ کا تعلق، فہم کا معاملہ  دلوں کے ساتھ ہے  اگر دل تندرست نہ ہوں ، دل بیمار ہوں تو عقل و فہم بھی جاتا رہتا ہے جیسے حدیثِ پاک میں ارشاد ہوتا ہے آپ ﷺ نے فرمایا : "أَلَا وَإِنَّ فِي الْجَسَدِ مُضْغَةً إِذَا صَلَحَتْ صَلَحَ الْجَسَدُ كُلُّهُ وَإِذَا فَسَدَتْ فَسَدَ الْجَسَدُ كُلُّهُ ، أَلَا وَهِيَ الْقَلْبُ " .غور سے سن لو بدن میں گوشت کا ایک لوتھڑا ہے اگر وہ درست ہو گا تو پورا بدن درست ہو گا اور اگر اس میں بگاڑ آئے گا تو پورے بدن میں بگاڑ آئے گا غور سے سن لو وہ  ٹکڑا آدمی کا دل ہے"  یعنی اگر دل صحت مند نہیں ،دلوں میں بگاڑ ہے، دلوں کو نورِ ایمان نصیب نہیں، دل برکاتِ نبوتﷺ اور انواراتِ باری تعالیٰ سے محروم ہیں تو یہ بیمار ہو جاتے ہیں  اور جب دل بیمار پڑ جائیں  تو دینِ اسلام اطلاعات بن کر رہ جاتا ہے، اخبار بن کر رہ جاتا ہے  یہ کبھی بھی ضابطہ حیات نہیں بنتا۔ اور پھر معاملہ یہاں تک خراب ہو جاتا ہے کہ ایک دن میری ایک بندے سے ازدواجی  زندگی پہ بات ہو رہی تھی تو جیسے ہی میں نے اسلام کی بات کہ کہ  اسلام اس بارے میں ہماری کیا رہنمائی کرتا ہے تو موصوف کہنے لگے  کہ تم مولوی لوگ ہر بات میں دین کو لے آتے ہو ۔ حالانکہ زندگی کا کوئی پہلو ایسا نہیں جس کی رہنمائی ہمیں قرآن و سنت ِ خیر الانامﷺ میں نہ ملتی ہو۔ لیکن ہم نے اسلام کو مسجد تک محدود کر کے رکھ دیا ہے ، مسجد سے باہر نکلنے کے بعد ہم چاہتے ہیں کہ ہم زندگی ایسی گزاریں جیسی مجھے پسند ہے یا جیسے میری مرضی ہے، جیسے مجھے اچھا لگتا ہے جبکہ اسلام صرف مسجد کے اندر کے معاملات یعنی عبادات وغیرہ کا نام نہیں بلکہ ضابطہ حیات ہے ، زندگی کے ہر پہلو میں ، زندگی کے ہر معاملے میں ہماری رہنمائی فرما تا ہے۔

پھر اللہ تبارک و تعالیٰ ان لوگوں  کی سزا کا بیان فرماتے ہیں اور سزائیں بھی دو طرح کی ایک دنیوی اور دوسری اخروی۔ دنیوی سزا کیا ہے ؟ فرمایا   فَزَادَهُمُ اللَّهُ مَرَضًا  اللہ ان کی مرض کو اور بڑھا دیتا ہے  یعنی دنیا میں یہ جس بہکاوے میں اور دھوکے میں پڑ چکے ہیں اللہ تعالیٰ کا ان پہ عذاب کی ایک صورت یہ ہے کہ یہ گمان ،یہ دھوکہ ان پہ ایسے مسلط ہو جاتا ہے کہ یہ کبھی اس سے نکل ہی نہیں سکتے ۔ اور پھر آخرت میں ان کی سزا کیا ہو گی ؟ فرمایا    وَلَهُمْ عَذَابٌ أَلِيمٌ  ان کے لئے صرف عذاب نہیں بلکہ دردناک عذاب ہو گا ، یہ سخت تکلیف میں ہوں گی  اور اس کی وجہ کیا ہے ؟  فرمایا  بِمَا كَانُوا يَكْذِبُونَ  یہ اس وجہ سے ہے جو یہ جھوٹ بولتے تھے کہتے کچھ اور تھے اور کرتے  کچھ اور تھے ، زبان کا دعویٰ کچھ اور تھا اور عمل اس کے خلاف کرتے تھے وہ کہتے تھے کہ ہم اللہ پہ ایمان رکھتے ہیں  اور پھر اس کی نافرمانی بھی کرتے تھے، وہ کہتے تھے کہ ہم آخرت کو مانتے ہیں  لیکن انہیں یومِ حساب کا ذرا برابر بھی خوف نہ تھا، وہ کہتے تھے کہ ہم رسول اللہ ﷺ سے محبت کرتے ہیں  لیکن آپﷺ کے اسوہ حسنہ اور سنتِ محمد الرسول اللہ ﷺ کو نہیں اپناتے تھے۔

اللہ تبارک وتعالیٰ ہمیں صراطِ مستقیم سمجھنے اس پہ عمل کرنے اور تا دم آخر اس پہ قائم رہنے کی توفیق و ہمت عطا  فرمائے۔

آمین یا رب العالمین

دعاؤں کا طالب

ابو محمد زبیر اویسی

مکمل تحریر >>>